Our Legacy & Beliefs

Hazrat Maulana Chand Miyan Qadri Barkati Jamia Gulshan-e-Barkaat ke baani aur roohani rehnuma hain. Aap ki wiladat 29 Ramadan 1980 ko hui aur sirf teen mah baad Sarkar Syed Hasan Miyan Qadri Barkati rahmatullah alaih ne apni goad mein lekar aap ko murid farmaya. Aap ki ibtidaai taleem apni walida se shuru hui aur apne gaon Hyderabad, tehsil Gola Gokarannath, zila Lakhimpur Kheri mein hasil ki. Baad mein Hifz-ul-Quran ke liye Madrasa Sayyidul Uloom Kasganj tashreef le gaye aur phir Madrasa Ahsanul Uloom Sikandara Rao mein dars-e-nizami aur maulviyat ki taleem mukammal ki. Uske baad Fatehpur Bajhera, zila Hathras mein ek masjid mein imamat farmai aur khidmat-e-khalq ke saath logon ko deen ki dawat di, bachon ko Quran-e-Pak ki taleem di aur roohani tarbiyah ka silsila jari rakha. Ek jalsa ke mauqe par Mufti Ashiqul Qadri Khalifa-e-Ziya-e-Millat Kalpi Sharif ne aap ko khilafat se nawaza, jabke Bareilly Sharif se Simnani Miyan aur Mannani Miyan ne bhi khilafat ata farmayi. Iske ilawa Khanqah Bilgram Sharif ke Syed Anas Miyan Wasi aur Syed Badshah Husain Basti ne bhi khilafat di, aur Marhara Sharif se Syed Najib Haider Miyan Qadri Barkati Noori ne madrasa ke jalsa mein khilafat se nawaza. Hazrat Chand Miyan Qadri Barkati silsila-e-Barkatiya se taluq rakhte hain aur aaj bhi logon ko murid karte hain; aap ke murideen mukhtalif zilon, gaon aur kasbon mein paye jate hain. Aap ne apne peer Sarkar Syed Hasan Miyan Qadri Barkati ki yaad mein Jamia Gulshan-e-Barkaat madrasa qayam kiya jahan door-door se talaba aakar Ilm-e-Deen hasil karte hain. Aap ka khandan kai pushton se Marhara Sharif ke buzurgon se mureed raha hai. Aap ke chaar bhai, do behne aur chaar bete hain: Mufti Afzal Barkati, Ahmad Barkati, Aman Barkati aur Muhammad Arsalan Barkati, jabke ek god li hui beti Ayesha bhi hai. Hazrat se log dua aur taweez ke zariye bhi faiz hasil karte hain aur aap hamesha taleem ki ahmiyat par zor dete hue apni khanqah ka mashhoor nara pesh karte hain: “Aadhi roti khayein magar bachon ko zaroor padhayein.”